ብዛዕባ ስድራቤታዊ ዳግመ-ምትእኽኻብን፤ ነፍስኻ ባዕልኻ ናይ ምንባይን ጠለባት ዚምልከቱ፤ ልሙዳት ዝዀኑ ሕቶታትን መልሲታትን

Frågor och svar om familjeåterförening och försörjningskrav – tigrinska

  • ስድራቤተይ ናብ ሽወደን ክመጹ ይኽእሉዶ?

    ስድራቤትካ ናባኻ ናብ ሽወደን መጺኦም ንምቕማጥ፤ ፍቓድ-መቐመጢ ንምርካብ ከመልክቱ ዕድል ኪህልዎም ዚኽእል፤ እንተ ደኣ ንስኻ/ኺ፡-

    ”ቀዋሚ” (permanent) መቕመጢ-ፍቓድ ኣልዩካ

    • ”ስደተኛ” ዚብል ”ብጊዜ ዝተደረተ” መቐመጢ-ፍቓድ ምስ ዚወሃበካ
    • ብጊዜ ዝተደረተ፡ ከም ዑቕበኛ ወይ ከም ኣማራጺ ዑቕባ ዘድልዮ ሰብ ተቘጺርካ፥ መንበሪ-ፍቓድ - ዝተዋህበካ ሰብ ኴንካ
  • ኣብዚ ዚስዕብ፡ ንዓኻን ንስድራቤትካን፡ እንታይ ኪምልከተኩም ከም ዚኽእል፤ ገለ ኣብነታት ክተንብብ ኢኻ።

    ኣነ፡ ብደረጃ-ዑቕበኛ ፍቓድ ዝተዋህበኒ ሰብ’የ

    እቶም ናይ ቀረባ ስድራቤትካ፡ መንበሪ ፍቓድ ረኺቦም፡ ምሳኻ ናብ ሽወደን ንምንባር ንኽመጹ፡ ምልክታ ከቕርቡ ይኽእሉ እዮም - እዚ ድማ ክሳብ’ቲ ናትካ ፍቓድ ዘገልግለሉ ጊዜ እዩ። ስድራቤትካ እንተ ደኣ ካብቲ ንስኻ መንበሪ-ፍቓድ ዝረኸብካሉ ጊዜ ሰለስተ ኣዋርሕ ምስ ሓለፈ ኣመልኪቶም፥ እቲ ስድራቤትካ ናይ ምንባይ ጠለብ ክምልከተካ እዩ። እቲ ስድራቤትካ ናይ ምንባይ ጠለብ፡ እንተ ደኣ ምስ ስድራቤትካ ኣብ ሓንቲ ካብ ሕብረት-ኤውሮጳ ወጻኢ ዝዀነት ሃገር ንምትእኽኻብ ዕድል ዘሎኩም ኰይኑ ወይ ውን እቲ ዝተፈጥረ ዝምድና ሓድሽ እንተ ደኣ ዀይኑ፥ ንዓኻ ይምልከተካ እዩ።

    ኣነ፡ ብደረጃ ኣማራጺ-ዑቕበኛ ፍቓድ ዝተዋህበኒ ሰብ’የ

    እቶም ናይ ቀረባ ስድራቤትካ፡ መንበሪ ፍቓድ ረኺቦም፡ ምሳኻ ናብ ሽወደን ንምንባር ንኽመጹ፡ ምልክታ ከቕርቡ ይኽእሉ እዮም - እዚ ድማ ክሳብ’ቲ ናትካ ፍቓድ ዘገልግለሉ ጊዜ እዩ። ስድራቤትካ እንተ ደኣ ካብቲ ንስኻ መንበሪ-ፍቓድ ዝረኸብካሉ ጊዜ፡ ሰለስተ ኣዋርሕ ምስ ሓለፈ ኣመልኪቶም፥ እቲ ስድራቤትካ ናይ ምንባይ ጠለብ ክምልከተካ እዩ። እቲ ስድራቤትካ ናይ ምንባይ ጠለብ፡ እንተ ደኣ ምስ ስድራቤትካ ኣብ ሓንቲ ካብ ሕብረት-ኤውሮጳ ወጻኢ ዝዀነት ሃገር ንምትእኽኻብ ዕድል ዘሎኩም ኰይኑ ወይ ውን እቲ ዝተፈጥረ ዝምድና ሓድሽ እንተ ደኣ ዀይኑ፥ ንዓኻ ይምልከተካ እዩ።

    ኣነ፡ ዕድመይ ትሕቲ 18 ዓመት፡ ብዘይ ስድራቤት ናብ ሽወደን ዝመጻእኩ ’የ።

    ብዘይ ወለዲ ከም ዝመጻእካ ቆልዓ መጠን፤ እንተ ደኣ ከም ስደተኛ ወይ ከም ኣማራጺ ዑቕባ ዘድልዮ ሰብ ተቘጺርካ፥ መንበሪ-ፍቓድ - ዝተዋህበካ ሰብ ኴንካ፤ ንስድራቤታዊ ምትእኽኻብ ድማ ዕድል ኣሎካ። ሽዑ ድማ፡ ወለድኻን ንኣሽቱ ኣሕዋትካን፥ መንበሪ ፍቓድ ረኺቦም፡ ምሳኻ ናብ ሽወደን ንምንባር ንኽመጹ፡ ምልክታ ከቕርቡ ይኽእሉ እዮም - እዚ ድማ ክሳብ’ቲ ናትካ ፍቓድ ዘገልግለሉ ጊዜ እዩ።

    ከም ቆልዓ መጠን፡ እቲ ስድራቤትካ ናይ ምንባይ ጠለብ ንዓኻ ኣይምልከተካን’ዩ።

    ኣነ ዘላቒ (permanent) ዝዀነ መቐመጢ ፍቓድ ረኺበ ኣሎኹ።

    እቶም ስድራቤትካ፤ ናብ ሽወደን መጺኦም ምሳኻ ንኽነብሩ፤ ናይ መቐመጢ-ፍቓድ ምልክታ ከቕርቡ ዕድል ኣሎዎም። ሽዑ ግን ንስኻ ድማ፤ እቲ ስድራኻ ናይ ምንባይ ጠለብ ይምልከተካ እዩ።

    ብዛዕባ ስድራቤታዊ ዳግመ-ምትእኽኻብን ነፍስኻ ናይ ምንባይ ጠለብን ኣብዚ ብዝያዳ ኣንብብ

  • እቲ ነፍስኻ ባዕልኻ ናይ ምንባይ ጠለብ፤ ነቶም ናይ “ኮታ-ስደተኛታትከ” ይምልከቶም ድዩ?

    ሓደ ኣባል ስድራቤት ናይ ኮታ-ስደተኛ ዝዀነ ሰብ፤ ንመቐመጢ-ፍቓድ ምስ ዘመልክት፤ እቲ ነፍሳኻ ናይ ምንባይ ጠለብ ይምልከቶ እዩ፤ እንተ ደኣ እቲ ምልክታ፤ ብድሕሪ ‘ቲ ኣብ ሽወደን ዘሎ ዘመዱ ፍቓድ ምርካቡ፤ ሰለስተ ወርሒ ድሒሩ ኣትዩ። እዚ ነፍስኻ ናይ ምንባይ ጠለብ ኪምልከተካ ዚኽእል ካልእ ኩነታት ድማ፤ እቶም ስድራቤት፡ ኣብ ሓንቲ ካብ ሕብረት-ኤውሮጳ ወጻኢ ዝዀነት ሃገር፤ ንዳግመ-ምትእኽኻብ ዕድል እንተ ደኣ ሃልይዎም ወይውን እቲ ዝምድና፤ ሓድሽ ዝተፈጥረ እንተ ዀይኑ ‘ዩ።

  • ከም ኣባል ስድራቤት ኪቝጸር ዚኽእል ሰብ መን ’ዩ?

    ብጊዜ ዝተደረተ መንበሪ-ፍቓድ ዝተቐበልካ ሰብ እንተ ዄንካ፥ መንበሪ ፍቓድ ረኺቦም፡ ምሳኻ ናብ ሽወደን ንምንባር ንኽመጹ ምልክታ ከቕርቡ ዚኽእሉ፥ እቶም ናይ ቀረባ ኣባላት ስድራቤትካ ጥራይ እዮም። እቶም ከም ናይ ቀረባ ኣባላት ስድራታቤትካ ዚቝጸሩ፥ ሰብኣይካ፡ ሰበይትኻ ወይ ምዝግብቲ-መቃምጥቓ፥ ከምኡ ውን እቶም 18 ዓመት ዘይመልኡ ውላድካን እዮም። ንስኻን እታ መጻምድትኻን ድማ፡ ክልቴኹም 21 ዓመት ዝመላእኩም ክትኰኑ ይግባእ። ናይ ሓባር ውላድ ምስ ዚህልዉኹም፥ ካብቲ ናይ ዕድመ-ጠለብ ፍሉይ ኣረኣእያ ኪግበር ይኽእል’ዩ። ዕድሜኻ ትሕቲ 18 ዓመት ምስ ዚኸውን፥ እቶም ወለድኻ ከም ናይ ቀረባ ስድራቤትካ እዮም ዚቝጸሩ።

    ”ዘላቒ” (permanent) መቐመጢ-ፍቓድ ዝረኸብካ ምስ ትኸውን፤ ካልኦት ናይ ቀረባ ኣዝማድካ ውን እንተዀኑ፤ ናብ ሽወደን ናባኻ መጺኦም መታን ክቕመጡ፤ ኣብ ፍሉይ ዝዀነ ኩነታት፡ ናይ መቐመጢ-ፍቓድ ንምርካብ፤ ምልክታ ከቕርቡ ዕድል ኣሎዎም።

    ብዛዕባ ንኻልእ ናይ ቀረባ-ዘመድ ዚምልከት መቐመጢ-ፍቓድ ኣብዚ ብዝያዳ ኣንብብ (ብቛንቛ አንግሊዝ)

  • እቲ ነፍስኻ ናይ ምንባይን ቤት ክህልወካን ዚብል ጠለብ እንታይ ማለት ’ዩ

    እቲ ነፍስኻ ባዕልኻ ምንባይን ቤት ንኽህልወካን ዚብል ጠለብ ማለት፤ እቲ ንዓኻን ንስድራቤትካን ባዕልኻ ክትናቢ ምኽኣልን፤ እኹል ዝዀነ ስፍሓት ዘሎዎ ቤት ክህልወካን ማለት ’ዩ።

    ብዛዕባ ነፍስኻ ባዕልኻ ናይ ምንባይን ናይ ቤትን ጠለባት ኣብዚ ብዝያዳ ኣንብብ

  • E ስድራቤተይ ከመልክቱ ከሎዉ፤ ኣነ፡ ንዓይን ንስድራቤተይ ባዕለይ ክናቢ ከም ዚኽእል ንኸርኢ እግደድ ድየ? ወይ ብዛዕባ ‘ቲ ዘሎኒ እቶት ዚምስክር ሰነድ፤ ጸኒሐ ከቕርብዶ እኽእል ‘የ?

    ሚግራሾንስቨርከት፡ እቲ ምልክታ ክኣቱ ከሎ፤ ንስኻ፡ ንነብስኻን ነቶም ኣባላት ስድራቤትካን ክትናቢ ከም ትኽእልን፤ ከምኡውን ምስ መጹ ዚቕመጡሉ እኹል ስፍሓትን ቅቡል-ደረጃን ዘሎዎ ቤት ከም ዘሎካን፤ ብዕሉ ክቆጻጸር እዩ። እቲ ቤት ድማ፡ ካብቲ እቶም ስድራቤትካ ዝመጽኡሉ ጊዜ ጀሚርኩም፡ ክጥቀሙሉ ክትክእሉ የድሊ እዩ። ሓደ ሰብ፡ ነዚ ጠለባት ‘ዚ ክማልእ ዘይክኣል ምስ ዚኸውን፤ ናይቲ ስድራቤት መቐመጢ-ፍቓድ ንምርካብ ኣቕሪብዎ ዘሎ ምልክታ፤ ንሱ ክንጸግ እዩ።