Thanakeribe (smeštaj)

Boende – romani arli

I Migraciaki Agencia šaj te pomožinel tumenge te nane tumen kher džikana adžikerena i odluka (decizia) baši tumari aplikacia bašo azili. Šaj em te birinen (alusaren) korkori te arakhen tumenge kher, sar egzamplo (primer) te ačhoven ki tumari familia ja ko amala. Te biringen (alusargjen) korkori te arakhen tumenge smeštaj (thanakeribe), tgani valjani te den tumari adresa e Migraciakere Agenciake ki te šaj te kontaktirinel tumen.

Kher arakhlo tari Migraciaki Agencia

I Migraciaki Agencia ka arakhel tumenge (harne vakteskoro) privremeno kher džikana adžikerena i odluka (decizia). I Migraciaki Agencia ka pokinel e khereske te nane tumen love.

Ka valjani te dživdinen odothe kaj ka arakhen tumenge than

Te valjangja tumenge pomoš tari Migraciaki Agencia te arakhel tumenge kher, nane te oven ko šajdipe korkori te birinen (alusaren) o than, numa valjani te oven spremna (hazri) te džan ko than kote so isi kher. Šaj em te džan ko nevo kher džikana adžikerena i odluka (decizia) ki te šaj te kerel pe than pobute dženenge-aplikantia.

Isi šajdipe te ulaven soba (kamra, odaja)

O khera tari Migraciaki Agencia si salde e dženenge kola rodena azili. Te nudingja pe tumenge than ko kher, akava than si salde tumenge. Ko kher majbut droma isi jek apartmani kova ulavela pe avere manušencar. Jekhe familia sakana ka ovel than korkori peske. O manuša kola si korkori (bizi familia) isi šajdipe te ulaven soba (karma, odaja) avere manušencar taro isto poli.

Te valjangja tumenge, taro bilo save pričine, specialno adaptirime kher, keren lafi tumare centarea baši leljaribe (prifatno centari). I Migraciaki Agencia ka obezbedinel sakoneske kova dživdinela ko kher te osetinel pe bezbedno (arakhlo) ko plo khereskoro maškar. Važno (džanlo) si sakova jek manuš ko kher te kerel sajgia jek avereske em te sikavel haljovibe (akjaripe) baši avereskiri religia, kultura ja seksualno orientacia.

Ker lafi tle prifatibaskere (leljaribaskere) oficerea (službenikoja) so posigate te sian LBGT em te si tut specialno potrebe phanle tire smeštajeja (thanakeribaja). Ka kera so šaj te arakha tuke kher kote so ka osetine tut arakhlo (bezbedno).

O bešibe ko kher završinela (avela dži agor)

Mora (musaj) te dža tuke taro kher te leljan odluka (decizia) baši deportacia ja paldibe em odoja odluka (decizia) khuvgja ki sila (takati), ja te reslja o paluno roko baši džaibe. Akava važinela e pherde beršale manušenge kola na dživdinena čhavencar kolen arakhena em kola si potikne taro 18 berša.

Korkori arakhlen tumenge kher

Te na manglen te dživdinen ko kher tari Migraciaki Agencia, šaj te arakhen tumenge korkori kher. But manuša alusarena (odlučinena) te ačhoven pe familiende ja ko amala džikana adžikerena odgovor (džovapi) baši lengiri aplikacia bašo azili. Te alusargjen (odlučingjen) te arakhen tumenge korkori kher, ka valjani korkori te pokinen sa o hardžia.

Tari bilo savi pričina (sebepi) te našti pobut te dživdinen ko kher kole korkori arakhlen le tumenge, ka šaj te džan ko kher kova ka arakhel tumenge i Migraciaki Agencia, kote so isi čučo than. Roden pobut informacie ko prifatno (leljaribaskoro) centari kote so sien registririme.

Bi dikhindor alusargjen li (biringen li) te dživdinen ko kher kova arakhle tumenge i Migraciaki Agencia ja palem korkori arakhlen tumenge thanakeribe(smeštaj), mora (musaj) te oven dostupno e Migraciakere Agenciake kit e šaj te kontaktirinel tumen. Ikeren ki godi te informirinen tumare prifatno (leljaribaskere) centare baši nevi adresa te gelen te dživdinen avere thaneste ko periodi džikana adžikerena.

Te lelen mukibe (dozvola) te ačhoven

Te dživdinena ko kher so arakhlja le tumenge i Migraciaki Agencia, šaj te len piko (pomoš) tari Migraciaki Agencia te arakhen nevo kher kana ka len o mukibe (dozvola) baši ačhovibe. Šaj panda te dživdinen ko kher so arakhlja le tumenge i Migraciaki Agencia sa džikana i Migraciaki Agencia na arakhela tumenge nevo kher. Te dživdinena ko kher so korkori arakhlen le tumenge ja lelen mukibe (dozvola) te ačhoven upri baza tari buti, ka mora (musaj) te arakhen tumenge korkori kher.

Drabar (čitin) pobut so ovela te leljan mukibe (dozvola) baši sakanutno (stalno) ačhovibe

Drabar (čitin) so ovela te leljan mukibe (dozvola) baši harne vakteskoro (privremeno) ačhovibe

Last updated: 24 August 2017

Was the information on this page helpful to you?