که چېرې تاسو استیناف غواړئ

Om du vill överklaga – pashto

که چېرې د کډوالو چارو ادارې ستاسو په کیس کې یوه پرېکړه کړې وي چې تاسو ته منظوره نه وي نو تاسو کولی شئ چې د پرېکړې په خلاف د استیناف غوښتلو لپاره لوړو مقاماتو ته مراجعه وکړئ. لاندې د استیناف غوښتلو په اړه اړوند معلومات وړاندې شوي دي.

که چېرې تاسو د کډوالو چارو ادارې د پرېکړې څخه راضي نه یاست نو حق لرئ چې د استیناف (مرافعې) غوښتنه وکړئ. استیناف غوښتل دا معنی لري چې تاسو غواړئ چې د کډوالو چارو ادارې پرېکړه دې بدله شي. د استیناف غوښتنه د یوې محکمې لخوا څېړل کېږي خو تاسو باید خپل د استیناف عریضه د کډوالو چارو ادارې ته واستوئ. ستاسو د کیس په پرېکړه کې لیکل شوي وي چې تاسو د استیناف عریضه وړاندې کولو لپاره څومره وخت لرئ چې دا موده په زیاتره حالتونو کې تاسو ته د پرېکړې د اعلام د ورځې څخه نېولې تر درېو اونیو پورې غځېدلې وي. که چیرې تاسې کوم وکیل ولرئ نو کولی شئ چې د وکیل څخه د استیناف غوښتلو په برخه کې لازمه مرسته ترلاسه کړئ.

که چېرې تاسو اقامې ته عریضه کړې وي، غوښتنه مو رد شوې وي او د پرېکړې ترلاسه کولو په وخت په سویډن کي شتون لرئ نو بیا هم باید ځان وطن ته د ستنېدو لپاره چمتو کړئ. ستاسو د کیس په فیصله کې لیکل شوي وي چې آیا تاسو د محکمې لخوا د خپل استیناف ځواب ته د انتظار په وخت په سویډن کي د پاتې کېدو حق لرئ او که نه.

د کډوالو چارو محکمه ستاسو د استیناف غوښتنه څېړي

لومړی د کډوالو چارو اداره ستاسو د استیناف غوښتنې باندې غور کوي ترڅو وګوري چې آیا پرېکړه کې کوم بدلون راتلی شي او که نه. که چېرې د کډوالو چارو اداره دې نتیجې ته ورسېږي چې د پرېکړې د بدلولو لپاره کوم دلیل وجود نلري نو د استیناف غوښتنه د کډوالو چارو محکمې ته استول کېږي. محکمه کېدای شي پرېکړه بدله کړي یا د کډوالو چارو ادارې سره موافقه وکړي.

سر د هغې ورځې څخه چې د کډوالو چارو محکمه ستاسو د استیناف غوښتنه ترلاسه کړي نو تاسو باید د خپل د استیناف غوښتنې او د محکمې د کار په اړه په ټولو مسائلو کې محکمې ته رجوع وکړئ. د کډوالو چارو د محکمې پرېکړې او رایې تر څارنې لاندې نیول ستاسو خپل مسئولیت دی، د کډوالو چارو اداره ستاسو لپاره دا مسئولیت پرغاړه نه اخلي.

وروسته له دې چې ستاسو د استیناف غوښتنه محکمې ته وسپارل شي تاسو وکیل سره د لیدو کتو په موخه د سفرونو لپاره د کډوالو چارو ادارې څخه پيسې نه ترلاسه کوئ.

که چېرې تاسو خپله فیصله بدله کړئ او خپله د استیناف غوښتنه بېرته اخیستل غواړئ نو د کډوالو چارو ادارې ته خبر ورکړئ چې تاسو ته شوې پرېکړه منظوره ده. بیا ستاسو د استیناف غوښتنه نه څېړل کېږي او له دې وروسته تاسو د دغې پرېکړې په خلاف لوړو مقاماتو ته مراجعه یا په بل عبارت د استیناف غوښتلو حق نه لرئ.

د استیناف غوښتنه په لاندې ډول لیکل کېږي

په پرېکړه کې د استیناف د غوښتنې تګلاره ذکر شوې وي. که چېرې تاسو غواړئ چې د کډوالو چارو ادارې د پرېکړې په خلاف د استیناف غوښتنه وکړئ نو باید یو لیک ولیکئ او په هغې کې ولیکئ چې تاسو کومه پرېکړه او ولې غواړئ چې د کډوالو چارو ادارې لخوا بدله شي. د دې لیک سره هغه اسناد او نور شواهد، ترجیحاً اصل یې، چې ستاسو څرګندونې په ثبوت رسوي، هم واستوئ.

د استیناف غوښتنه کې باید خپل شخصي معلومات او خپل د کیس نمبر ولیکئ. د کیس نمبر ستاسو د کیس په فیصله کې لیکل شوی وي. که چېرې تاسو پناه غوښتونکي یاست نو د کیس نمبر ستاسو د ایل ایم آ په کارت کې هم لیکل شوی وي. خپله پته او د ټیلیفون شمېره هم ولیکئ چې د کډوالو چارو اداره یا محکمه د هغې لارې تاسو سره اړیکه ونیولای شي.

دا اړینه ده چې ستاسو د استیناف غوښتنه د ټاکلي وخت دننه دننه د کډوالو چارو ادارې ته وسپارل شي. د دې پاڼې په لاندې برخه کې شته جدول کې کولی شئ چې وګورئ چې نظر دې ته چې دا کوم ډول پرېکړه ده تاسو د استیناف غوښتنې لپاره څومره وخت لرئ. د استیناف غوښتنې وخت د هغې ورځ څخه پیلېږي په کومه ورځ چې تاسو ته پرېکړه اعلام شوي وي.

که چېرې تاسو په خپله نشئ کولای چې د استیناف غوښتنه وکړئ نو کولای شئ چې د بل چا څخه مرسته وغواړئ ترڅو ستاسو لپاره د استیناف غوښتنه وکړي. په داسې حالت کې باید د هغې کس په نوم چې تاسو سره مرسته کوي، د کډوالو چارو ادارې ته یوه وکالتنامه تسلیم کړئ.

وکالتنامه څه ته وایي؟

یوه وکالتنامه کېدای شي یو لاسلیک شوی لیک وي چې په دې کې هغه کس چې د اقامې غوښتنه لري یو بل کس ته واک ورکوي چې د هغه استاذیتوب او وکالت وکړي. یوه وکالتنامه د بېلګې په توګه یو بل کس ته حق ورکولی شي چې ستاسو په نمایندګۍ عریضه وکړي، د یوې پرېکړې دلایلو څخه ځان خبر کړي او یا د یوې پرېکړې په خلاف د استیناف غوښتنه تقدیم کړي. وکالتنامه باید د هغې کس لخوا څوک چې بل کس ته واک او کالت ورکوي ولیکل شي او د غوښتنې په وخت یې باید اصل د کډوالو چارو ادارې ته وښودل شي.

تاسو یو بل کس ته وکالت سپارلو لپاره باید د کډوالو چارو ادارې ته یو لیک راواستوئ چې په هغې کې لاندې نکات ذکر شوې وي

  • چې دا یوه وکالتنامه ده
  • د وکالت ورکوونکي نوم، د پیدایښت نېټه او پته
  • چا ته چې وکالت ورکول کېږي د کومو چارو ترسره کولو حق لري
  • د وکیل نوم، د پیدایښت نېټه او پته
  • د وکالت ورکوونکي لاسلیک
  • د وکالتنامې د لیکلو نېټه او ځای

Power of Attorney, form number 107011 (په انګلیسي ژبه)PDF

که چېرې تاسو د کډوالو چارو د محکمې د پرېکړې په خلاف د استیناف غوښتنه لرئ

که چېرې تاسو د کډوالو چارو محکمې د پرېکړې څخه راضي نه یاست نو کولای شئ چې د محکمې فیصله ترلاسه کولو د ورځې څخه د درېیو اونیو دننه دننه د کډوالو چارو سترې محکمې ته اعتراض وړاندې کړئ. د کډوالو چارو ستره محکمه وروستۍ مرجع ده او د دې محکمې پرېکړې د کډوالو چارو محکمې او د کډوالو چارو ادارې لپاره په ورته قضیو کې د عمل کولو معیار وي.

د کډوالو چارو ستره محکمه صرف ځینې خاص کیسونه څېړي چې په هغې کې قانوني لارښوونه او سابقه موجوده نه وي او یا دا چې د کډوالو چارو محکمې کیس په ناسمه توګه څېړلی وي. په زیاتره کیسونو کې د کډوالو چارو ستره محکمه پرېکړه کوي چې د استیناف غوښتنې باندې غور کولو څخه صرف نظر وکړي. په دې صورت کې د کډوالو چارو محکمې پرېکړه قطعي او نهایي ګرځي.

د هرې فیصلې په خلاف د استیناف غوښتنه امکان نلري

یو شمېر پرېکړې د استیناف وړ نه وي. ستاسو د کیس په پرېکړه کې لیکل شوي وي چې آیا تاسو د دغې پرېکړې په خلاف د استیناف غوښتنه کولای شئ او که نه. تاسو سربېره په نورو د لاندې ډول پرېکړو په خلاف د استیناف غوښتنه نه شئ کولای:

  • داسې یوه پرېکړه چې لومړی مو قبوله کړې وي او د رضایت په پاڼه مو لاسلیک کړی وي.
  • د کډوالو چارو د سترې محکمې فیصله چې ستاسو غوښته باندې غور ونکړي
  • ستاسو په کیس کې د لنډمهاله اقامې صادرولو فیصله

د بېلابېلو د استیناف غوښتنو لپاره بېلابېل وختونه

ستاسو د استیناف غوښتنه باید د ټاکلې مودې د ختمېدو څخه مخکې د کډوالو چارو ادارې ته وسپارل شي. که چېرې تاسو غواړئ چې د محکمې د فیصلې په خلاف د استیناف غوښتنه وکړئ نو باید د استیناف غوښتنه محکمې ته د ټاکلې مودې د ختمېدو څخه مخکې وسپارل شي. ستاسو د کیس په پرېکړه کې لیکل شوي وي چې تاسو د استیناف غوښتنې لپاره څومره وخت لرئ.

کله چې ټاکلې موده ختمه شي نو بیا وییل کېږي چې پرېکړي قانوني بڼه غوره کړې ده. دا په دې معنی ده چې د پرېکړې په خلاف نور د استیناف غوښتنه امکان نه لري.

د استیناف غوښتنې لپاره مهلتونه

د پرېکړې نوعیت

د استیناف غوښتلو موده

د خاورې ترک کولو فیصله

د پرېکړې ترلاسه کولو د ورځې څخه د درېیو اونیو دننه دننه

د عریضې د رد فیصله چې باید سمدستي عملی شي

د پرېکړې ترلاسه کولو د ورځې څخه د درېیو اونیو دننه دننه

د کډوالو چارو د محکمې فیصله

د پرېکړې ترلاسه کولو د ورځې څخه د درېیو اونیو دننه دننه

د اقامې د درجې په اړه پرېکړه

د پرېکړې ترلاسه کولو د ورځې څخه د درېیو اونیو دننه دننه

د سفر د جواز په اړه پرېکړه

د پرېکړې ترلاسه کولو د ورځې څخه د درېیو اونیو دننه دننه

د بهرنیو وګړو د پاسپورټ په اړه پرېکړه

د پرېکړې ترلاسه کولو د ورځې څخه د درېیو اونیو دننه دننه

سویډن څخه پر وخت نه وتلو له کبله شنګن هېوادونو ته د بیا داخلېدو بندیز

د کډوالو چارو ادارې لخوا فیصله صادرېدو څخه د درېیو اونیو دننه دننه

 د بل کوم علت له کبله د بیا داخلېدو بندیز

د پرېکړې ترلاسه کولو د ورځې څخه د درېیو اونیو دننه دننه

د ځانګړې مالي مرستې په اړه پرېکړه

د پرېکړې ترلاسه کولو د ورځې څخه د درېیو اونیو دننه دننه

د پیسو د کمښت یا قطع کولو په اړه پرېکړه

د کډوالو چارو ادارې لخوا فیصله صادرېدو څخه د پنځو اونیو دننه دننه

د متبادل پناه غوښتنې قانوني حیثیت اعلام (که چېرې تاسو فکر کوئ چې تاسو ته باید د سیاسي پناه قانونی حیثیت درکړل شوی وای)

د پرېکړې ترلاسه کولو د ورځې څخه د درېیو اونیو دننه دننه

د توقیف یا نظارت په اړه پرېکړه

هر وخت چې وغواړئ


Last updated: 11 September 2019

Was the information on this page helpful to you?

Thank you for helping us improve our website!

Thank you for helping us improve our website!

Tell us how we can make this page better*






If you wish to ask the Migration Agency a question you can find our contact details under the heading Contact us.